جزيرة بوهول تقرير مصور عن جزيرة العجائب في الفلبين

ننقل لكم هذا التقرير المصور عن جزيرة بوهول

– العدد 4 اشخاص
– الوصول عن طريق طيران سيبو باسيفيك.
– السكن منتجع هينان ريزورت الونا بيتش في جزيرة بوهول (Henann Resort Alona Beach Bohol) (غرفتين بريمير كل غرفة سرير فردي وسرير مزدوج) سعر الغرفة : 170 دولار الليلة مع فطور عن طريق تطبيق أقودا

تقرير بوهول الفلبين

اليوم الأول في جزيرة بوهول:

وصولنا كان العصر للمنتجع وبعد عمل التشيك إن طلبوا منا الجلوس في اللوبي لتقديم عصير ترحيبي، و بعد شرب العصير إتجهنا الى غرفنا رتبنا اغراضنا، و بعدها خرجنا لاكتشاف الموقع وأول ما جاوزنا بوابة المنتجع الا وعلى اليسار ذاك المطعم الإيطالي دخلنا للمطعم ونطلب فيه بيتزا الزيتون والتونة، وبعد البيتزا رجعنا ريحنا في غرفنا وقلنا الليل الها الا سباحة لأن المنتجع كله مسابح حتى الغرف اللي في الدور الأرضي تفتح على مسابح والممرات الساحات كلها مسابح والفلل كل فلة بمسبح خاص يعني خليك لابس شورت السباحة على طول والمناشف جنب المسبح سجل رقم غرفتك وخذ منشفتك وشوفلك اقرب مسبح واذا تحب السباحة البحرية ما يهمك خطوتين وانت في البحر, بعد ما خلصنا سباحة رجعنا غرفنا وكل واحد اخذ دش بعدها خرجنا قلنا نروح ندور لعشا، لكن المفاجأة ان المطاعم كلها قفلت، أكيد نظامهم يقفلون عشرة المسا واحنا قعدنا نتنقع في المسابح وسرى بنا الليل المهم رجعنا للمنتجع وحصلنا بار مسابح الشاطئ مفتوح سألناهم في عندكم عيشة؟ قالوا فيه سناك شيبس وصحن فواكه. اكلنا من عندهم ورجعنا غرفنا وأحلى نومه.

تقرير جزيرة بوهول الفلبين

اليوم الثاني في جزيرة بوهول

صحينا الصباح ودايركت على مطعم المنتجع فطرنا وعينا من الله خير قلنا اليوم نخليه استجمام في المنتجع على الشاطئ و تحت أشجار جوز الهند و تنقع في ذي المسابح اللي كل واحد منها احلى من الثاني وإسترخاء ينسيك الدنيا وما فيها ، اما في الليل خرجنا لمطاعم السي فود اللي على الشاطئ وتلقاهم يعرضون لك انواع السمك والروبيان، بعد ما تختار يزبطون المشوي اللي على كيف كيفك ، ولا احلى من السمك و الروبيان المشوي الا جلساتهم اللي على الشاطئ طبعاً الإضاءة شموع والهوا بحري والجو ولا في الأحلام. تعشينا وعينا من الله خير وسهرنا في الكفيهات اللي هناك وبعدها رجعنا لفندقنا نبي ننام لأنه عندنا طلعة اليوم التالي من الصباح وراح تكون جولة سياحية على معالم جزيرة بوهول طبعا سبق و نسقنا مع سواق يمرنا الساعة تسعة الصبح من الفندق وبرجعنا قبل المغرب والأجرة 2000 بيسو.

تقرير جزيرة بوهول الفلبين

اليوم الثالث في بوهول

صحينا الصباح بدري فطرنا وتقهوينا الا وشرف السواق واتكلنا على الله وكانت بدابة الجولة زيارة لمشاهدة قرد التيرشير (أصغر قرد في العالم) تذكرة الدخول 60 بيسو للشخص .

بعدها اتجهنا الى نهر لوبوك وتجربة رحلة الكروز في النهر مع تناول الغداء ومشاهدة فرقة الرقص الشعبي روعة. سعر التذكرة 450 بيسو للشخص شاملة الغدا (بوفيه مفتوح).

بعد الكروز انطلقنا الى تلال الشوكولاتة ، تذاكر الدخول 60 بيسو وفيه العاب منوعة في الداخل ، لكن قال لنا السواق احسن خذوا لكم جولة ساعة كاملة بين التلال بالدبابات ATV مع مرشد سياحي وتوقفون تصورون براحتكم (900 بيسو للدباب / ساعة) قلنا تمام ، اخذنا اربعة دبابات و لبسونا الخوذات وعلمونا كيف نستخدم الفرامل والبنزين وانطلقنا الى تلال الشوكولاتة لكن اللي يبغى يشوف التلال من فوق لازم يوقف الدباب ويطلع مشي للقمة وتتمتع بالمنظر الخلاب من الأعلى والله ان الطلوع كان متعب شوي لكن الحقيقة ان المنظر يستاهل.

تقرير جزيرة بوهول الفلبين

بعد تلال الشوكولاتة في جزيرة بوهول جاء وقت المغامرة، لعبة الزيبلاين (zip line) يعلقونك بحبل ويدفونك من الجبل وتعبر الوادي جواً الى الجبل المقابل وترجع بنفس الطريقة شي ممتع. والأجمل من المغامرة المناظر اللي تشوفها تحت نهر وطبيعة خلابة.سعر التذكرة 350 بيسو للشخص ذهاب وعودة. بعد الزيبلاين مرينا على حديقك الثعابين لمشاهدة ثعبان الأناكوندا لكن ما اعتقد انه اناكوندا، المهم اننا دخلنا وتفرجنا على الموجود. تذكرة الدخول 30 بيسو للشخص.

تقرير جزيرة بوهول الفلبين

بعدها بدت الشمس تغيب قلنا للسواق يرجعنا للفندق بعد يوم حافل بالإثارة والتشويق والتعب.
بعد ما وصلنا الفندق اتجهنا لغرفنا نرتاح شوية بعدها قلنا خلونا نفكك عضلات في المسبح وبعد المغرب نزلنا تسبحنا للساعة ثمانية تقريباً ورجعنا بسرعة غرفنا تروشنا ولبسنا علشان ما تقفل المطاعم وقلنا الليلة نجرب الاسباغيتي الإيطالية في نفس المطعم الإيطالي وحقيقة انها كانت لذيذة جداً وبعد ما تعشينا هناك رجعنا متمشين على الشاطئ مع نسيم البحر المنعش وسهرنا في واحد من الكفيهات المنتشرة على الشاطئ ، بعدها رجعنا على غرفنا للنوم استعداداً لمغادرة جزيرتنا الساحرة في اليوم التالي عاقدين العزم على العودة اليها بإذن الله ولكن مع زيادة مدة الإقامة لتغطية كامل الفعاليات مثل الغوص ومشاهدة الدلافين.

اليوم الرابع ومغادرة بوهول

مغادرة المنتجع الى ميناء تقبيلاران وحجز تذاكر الفيري متوجهين الى سيبو.

تقرير جزيرة بوهول الفلبين

قم بكتابة اول تعليق

رد

لن يتم نشر بريدك الالكتروني في العلن


*